中環出更：李應生斥D ＆G損香港商譽
講誠信，永遠係做生意嘅首要原則，正係城中好多老字號嘅經營之道。第七屆「港澳優質誠信商號」及「我至喜愛港澳十大品牌」頒獎禮日前喺九龍麗思卡爾頓酒店舉行，眾多知名品牌老細齊齊現身，包括中藥世家百成堂集團主席李應生（Tommy）、日本人字牌救心代理商泰山企業老闆娘林陳鳳招、六福集團總經理區國球等人，氣氛好熱鬧。
Tommy一口氣橫掃兩個獎項，將有九十二年歷史嘅家族招牌省得靚靚，亦不負身為優質旅遊服務協會（QTSA）主席嘅重任。Tommy話，最近名店D&G禁止拍攝風波，令香港嘅購物天堂形象受損，但該品牌唔係QTSA會員，如果唔係就教吓佢哋點做個優質商戶喎。
陳國明潮賣趣怪超
至於眼鏡88亦獲獎，由董事總經理陳國明親自領獎，佢話港人追求時尚，眼鏡早已成為扮靚潮物，有客戶年花九十幾萬元買眼鏡添！集團最近新開專攻時尚路線嘅「EGG」概念店，專賣趣怪、新潮眼鏡，對象梗係後生仔，但竟然吸引七十歲男士幫襯，認真令人跌眼鏡。
卓妮