灣仔會議展覽中心生意多到接唔晒，除咗搞展覽及大型會議外，近年連婚宴及喜宴都做埋，場地供不應求。會展副董事總經理梅李玉霞話，好心急希望灣仔會展能夠再擴建，但早前提出想攞灣仔運動場塊地嚟擴建嘅建議，至今仍無回音，相信要等新特首到任才有機會知道能否成事。
談及會展多年成就時，梅太笑指兩個特首參選人都係租用會展場地宣布參選，但始終聽唔到佢哋啲政綱話支持會展擴建，令人好失望喎。佢話，現時會展每年約舉行一百二十個大型展覽，當中有一百個係例牌會搞嘅，所以開拓新展覽嘅空檔唔多，如果唔擴建只會白白流失生意，好鬼痛心。
其實夕陽政府仲有唔夠半年就換屆，班高官仲唔放軟手腳等收工咩，盡量少做少錯，相信好多大政策都要等到下屆政府先至可以拍板，商界同市民都係自求多福好啲喇。