政情：車公廟求好籤易出貓
每年農曆大年初二，鄉議局主席劉皇發都會去到沙田車公廟為香港求籤，去年求得嘅「威人威威不是威」，大家應該記憶猶新，車公準唔準實在不言而喻。以往一直有人懷疑，政界人士求籤，會唔會作弊㗎？但自從○三年時任民政事務局局長何志平求咗支下籤後，傳言即時被打破。不過，原來高官想易啲求支好籤都唔係冇計，有沙田地區人士就大爆求好籤嘅方法，就等我哋為大家揭秘。
沙田車公廟靈籤共有九十六支，其中上籤佔三十五支、中籤四十四支、下籤十七支，求得下籤嘅百分率大約係十七點七左右，睇落好似唔易，但有時衰起上嚟，就算幾難中都會中得到。以往一直有傳聞，啲高官為咗唔想抽到下籤而畀市民鬧「佗衰家」，都會命令啲隨從預早入廟準備，抽起晒啲下籤，再混入上籤同中籤，咁就萬無一失啦，但當然係真係假佢哋先至知喇。
不過，咁做其實同弄虛作假冇分別，你話以往殖民地政府就冇所謂啫，依家香港已經係中國人地方，再咁做只會貽笑大方，出貓啲人亦難以心安理得。於是有人諗到，將所有中上籤全部掉轉放入籤筒，咁就好容易求到好籤。原理好簡單，其實所有靈籤都有一邊係比較重，只要將上籤重嘅一面向上、輕的一面插入籤筒，咁喺物理學嚟講，重啲嘅自然易搖出。
怕對神靈不敬
雖然諗得出咁嘅方法，但到底有冇實行過呢？答案係「冇」。可能有人又會問，點解咁好計都唔採納呀，畀啲人求到支靚籤唔係幾好咩？地區人士解釋，夠唔夠膽咁做係另一回事，因為佢哋一向比較迷信，淨係諗諗都已經覺得自己對神靈不敬，更何況出手作弊添，根本就冇人肯去做呢啲嘢犯險得罪車公。
呢個說法其實不無道理，如果真係有作弊嘅話，負責求籤嘅人又點會接二連三抽到中籤同下籤吖。事實亦證明，造假對香港其實亦唔係好事，因為既然神明有啟示，信眾得悉後亦理應有所準備。嚟緊年初二，人人都想求番支好籤，希望龍年煲呔曾呢個瘟神一走，香港明天會更好啦。