滲水辦敷衍苦主鼓吹訴訟
滲水問題解決無期，由屋宇署及食物環境衞生署合組的聯合辦事處（滲水辦）被指形同虛設！先後有業主反映受滲水困擾多年，即使天花石屎剝落多時，滲水辦仍分別以「未找出滲水源頭」及「未發現滲水」為由停止跟進。立法會議員認為滲水辦角色及功能模糊，建議盡快檢討成效，挽回市民信心。
嚴小姐早前翻新彩蒲苑住所，拆去假天花補油時，赫然發現天花油漆剝落兼嚴重霉爛，受影響範圍更蔓延至廚房及浴室，隨即向滲水辦求助，惟事隔逾年後，至今仍未能根治，「次次查完一輪都話搵唔到邊度滲，冬天天氣乾燥冇咁濕，佢哋就唔跟，唔通等到變危樓先做嘢？」嚴曾自行去函上層業主交涉但不果，「管理處同滲水辦都話冇計，咁我哋啲小業主又可以點做？」
居於荃灣麗城花園的鍾太情況更差，自九四年起已受滲水問題困擾，「樓上每次租畀人就裝修，一裝修主人房嘅廁所就滲水，有次跌落嚟舊石屎有成對拖鞋咁大！」鍾太指滲水曾蔓延至電燈位置並引致短路，管理處只稱無法聯絡業主，事件便一直拖拉至今，「管理處見情況嚴重，先至出錢補番個天花，表面睇好似冇乜事，點知滲水辦話唔夠濕就唔跟，咁即係冇解決過啦！」鍾太坦言不滿滲水辦對滲水問題撒手不管，完全未能發揮協助市民功能。
滲水辦發言人證實，一○年十月、去年四月及五月分別接獲嚴小姐的滲水投訴，職員多次上門進行非破壞性測試後，仍未能找出滲水源頭，由於滲漏位置乾涸故停止跟進。至於麗城花園的個案，發言人指一○年初及去年十月接獲滲水投訴，經調查後未有發現，由於當事人指主人房天花有水珠出現，將會繼續跟進。
發言人重申，樓宇滲水一般因設施破損及缺乏維修所致，維修保養樓宇乃業主及住戶責任，建議業主可互相合作進行測試，亦建議可考慮循民事訴訟尋求解決。
專家：跌石屎損樓宇結構
驗樓師詹濟南指，滲水會令石屎剝落，影響樓宇結構，危害居民安全，「滲水可以有多個源頭，有時真係唔易搵，應該要花多啲時間調查了解。」
立法會房屋事務委員會委員陳淑莊直指滲水辦角色及功能模糊，「滲水問題係可以循法律途徑解決，但係太繁複，所以先要有滲水辦，但如果成日都處理唔到，又叫人訴諸法庭，咁仲有乜存在價值？」陳促滲水辦檢討工作成效，以增加市民對部門的認識和信心。
記者：陳倩儀