咦，又有政府部門執笠，點解咁得意嘅呢？發展局話喎，發展機遇辦事處將於今年六月之後不再運作。
照計絕對唔啱數，曾蔭權以及一眾官僚就話今年六月到期執包袱走人啫，即使唔腳痛都冇得留低，之但係冇理由連帶某一個辦事處都要冚旗。正所謂，鐵的衙門，流水的官，換來換去都只係換人，唔應該牽涉到鐵一般嘅衙門喎。
發展局係咁講嘅，發展機遇辦事處作為政府喺金融海嘯之後一項特別措施，相信辦事處已達到為土地發展項目提供協助嘅目標，部分透過辦事處嘅工作，涉及嘅政策事宜，正循政策發展處理，有關房屋用地供應嘅工作，應交由發展局相關小組處理，而非由主要官員辦公室直接處理。
噢，功夫茶記起嘞，○八年金融海嘯之後，曾班子整色整水整咗個經濟機遇委員會，然後就成立發展機遇辦事處，要應付經濟危機咁話。不過好可惜吖，經濟機遇委員會成班都係有名無實嘅蠶蟲師爺，最滑稽嘅係曾蔭權居然煞有介事向全人類公布，經過深思熟慮之後，結論係只要搵人清拆全港舊招牌就可以刺激經濟。咁噴飯嘅搞笑言論，幾乎令人誤會佢表演無厘頭棟篤笑。
雷聲大雨點小嘅經濟機遇委員會，後來無聲無息就結束營業。情況同當年由唐英年揸旗嘅扶貧委員會差不多，照樣係一班權貴吹吹水，然後拍拍屁股走人，留低貧富懸殊一大堆深層次矛盾未解決。
至於發展機遇辦事處咯喎，功夫茶諗來諗去都諗唔到有乜貢獻。發乜嘢展呢？機乜嘢遇呢？唔好意思，真係噏唔出。不如咁講啦，如果發展機遇辦事處真係有貢獻，都唔使今年六月之後不再運作啦，吓話！
唉，講來講去都係現屆政府太無能，餐餐都係虎頭蛇尾得個吉，有時仲要撞大板。好似新簇簇嘅添馬艦新政府總部咁吖，居然會變成退伍軍人症嘅惡菌俱樂部，夕陽政府淪為退伍政府，原本應該士氣高昂去打仗嘅軍人，一個二個變晒老弱殘兵。
發展機遇辦事處亦要停止運作，鐵的衙門也執笠，證明特區一哥曾蔭權以及特區二哥林瑞麟民望低殘係有道理嘅，鬼叫呢兩個難兄難弟冇一件事做得好咩。衙門執笠唯一好處係可以慳番一大筆公帑，納稅人嘅血汗錢唔使繼續供養大食懶。
之不過咁，一雞死，一雞鳴，政府另外建議成立九龍東發展辦事處，倡導觀塘同九龍灣規劃咁話，全年員工總開支一千八百六十萬元。唔好話功夫茶烏鴉嘴吖，辦事處即係扮事處，扮下扮下又係浪費公帑o架咋！