新政府總部愈嚟愈多司局長辦公室發現退伍軍人症桿菌，正當一眾公僕人人自危之際，食物及衞生局局長周一嶽尋日自爆話，佢搬入政府總部時，曾經開大水喉放水十至十五分鐘，花灑就開足十五分鐘，將啲可能有菌嘅儲水放走晒，難怪佢日日出入被毒菌大包圍嘅辦公室，都冇事啦！周一鑊呢一招「嘥水保命」嘅做法，認真自私，又唔與政府同僚分享，識佢嘅人都要慨嘆交友不慎喇！
