公民黨因為被指係港珠澳大橋同外傭居港權司法覆核嘅幕後黑手，濫用法律程序攪亂香港，喺區議會選舉成為過街老鼠，大敗而回。不過喺尋日嘅法律年度開啟，終審法院首席法官馬道立、律政司司長黃仁龍同大律師公會主席林孟達，就齊聲明撐或暗撐公民黨。梗係喇，呢三位法律界巨頭都係大狀出身，撐番外號「大狀黨」嘅公民黨絕對唔出奇！
黃仁龍尋日致辭時話，司法決定不能避免受到批評，而涉及公眾利益嘅判決，就更加會引起公眾評論，但無論如何，司法決定都一定要獨立同不偏不倚，絕對唔能夠受到公眾意見或者權宜方便而支配，暗撐公民黨毋須理會民意，繼續做一啲未必有利香港嘅司法覆核。
林孟達講得更明，話去年有大律師接官司後受到抨擊甚至謾罵，反映抨擊者對大律師嘅義務、責任同傳統一無所知。馬道立就撐得含蓄啲，話只要申請人有法律基礎，就唔存在濫用司法覆核程序問題，簡而言之都係打官司無罪、司法覆核有理喇。