政情：楊甦棣企硬月旦港事
美國駐港總領事楊甦棣過去曾月旦香港政事，無論種票、特首選舉，甚至內地維權藝術家艾未未，佢都曾經評論一番，一度仲搞到被外交部駐港特派員公署嚴辭批評。面對咁多風風雨雨，尋日楊甦棣趁住現身香港美國商會新任主席履新活動反擊，表明無論人哋講乜，佢都會繼續發聲。
香港美國商會新主席孫晨尋日履新，身為嘉賓嘅楊甦棣都好搶鏡。佢同大家講，相信近日有睇報紙、關注美國駐港領事嘅新聞都知道發生咗乜嘢事，美國駐港領事館會繼續秉持以香港成功及美國利益為大前提，佢本人亦會繼續發聲，姑勿論人哋講乜都好。好明顯楊甦棣並無封口之意。
相比之下，美籍華人孫晨講嘢就小心好多，佢自言商會負責促進內地、香港同美國嘅商貿發展，當然佢亦希望下任特首維持穩定發展，佢自己亦會善用自己背景，幫助商界掌握十二五規劃嘅機遇，但始終商會唔係評論政事嘅地方。