政情：天價舖租逼走田二少
做成衣起家嘅新民黨副主席田北辰，其一手創立嘅G2000喺銅鑼灣有五間分店，全部坐落人流極多地段，生意做極唔完，但有分店最近都敵唔過租金升幅嘅魔爪，就算田二少自願加租一半，業主都唔肯租畀佢，勢要田二少「讓位」畀其他舖頭。
銅鑼灣啟超道嘅G2000，田二少○六年已經開始租，間舖月尾到期，最近業主問田二少開到咩價，田二少好老實話，現時月租一百一十萬，G2000最多出到「天價」百五萬，點知有經紀話畀田二少知，有化妝品舖願意出到二百萬。不過高處未算高，有金舖出到二百二十萬，肯出「天天價」租舖嘅係錶行，出到二百五十萬。
田二少同我哋慨嘆，話G2000今次死而無怨，因為實在無能力畀二百幾萬租一個舖位，但佢從今次事件有所啟發，就係賣衫唔夠賣化妝品賺得多，化妝品又唔夠金舖好賺，最賺錢就係錶行。如果長期咁落去，遲啲成個銅鑼灣都只得珠寶同錶賣，究竟係咪好事？