政情：特首戰　醫界意向最惡估

骨科醫生高永文組成嘅「七君子」鑽石名單，只係得瑪嘉烈醫院內科及老人科顧問醫生羅振邦落選，佢哋喺選前已經承諾當選後會委託獨立機構向醫學界進行民調，再集體決定投票取向。不過，班選委仲頭痛緊搵咩機構做、要幾多使費等問題。

怕變公投 唔直接問揀邊個

佢哋又問過專業人士嘅意見，認為唔應該直接問選民支持邊個候選人，否則就會搞到好似變相公投咁。佢哋終於拍板，決定淨係問啲醫生覺得下屆特首應該具備乜嘢條件、點評價幾位候選人同埋佢哋關心邊啲民生議題等。但設定完份問卷之後又產生咗另一個問題，就係班醫生咁忙，寄問卷畀佢哋都唔知有無人覆，打電話畀佢哋嘅話又驚班醫生連聽電話都無時間。但高永文話幾困難都要做，因為佢哋應承過班選民。

西醫公會楊超發本來組成一張有十幾人嘅名單，但最後只係得佢一個成功當選，佢嘅遭遇仲可憐。楊超發上月向一萬一千多位醫學界選民發出問卷，最後只能回收到廿三份，佔總數百分之零點二一。喺咁無代表性嘅結果裏面，有十一人支持唐英年，十票支持梁振英。至於一班醫生最想下屆政府做到嘅三件事，依序就係減低貧富懸殊、解決住屋問題，同埋減輕中產嘅稅務負擔。

今次嘅回收率咁低，佢睇嚟一啲都唔灰心，話諗住農曆新年後再做多一次調查。楊醫生話佢依家都未決定支持邊個，不過如果再做調查回收率都係咁低，佢惟有根據自己嘅意願投票。醫生係社會嘅有識之士，但都對政治咁冷感，唔通佢哋掛住賺錢而乜都唔理。