中環出更：吳文華推介 歎立會鴛鴦
呢排添馬艦爆發退伍軍人症，搞到人心惶惶，不過尋日立法會餐廳開幕，唔知係咪算係一個好消息呢？咁啱畀卓妮撞到立法會秘書長吳文華（Pauline），孖住內務委員會主席劉健儀落嚟視察，Pauline仲賣花讚花香，對新餐廳嘅鴛鴦同咕嚕肉直豎拇指。
卓妮喺尋日晏晝三點幾下午茶時段去到立法會，只見足夠幾十人坐嘅餐廳得小貓三、四隻，餐廳負責人陳子仲話，咪睇下午茶時段好少人，其實午市嘅時候，佢哋已經做咗好多轉外賣。
Pauline一見到卓妮就話，尋日佢第一時間試食新餐廳嘅午餐，咕嚕肉、鴛鴦同例湯都好掂，至於劉健儀就未有捧場，佢話明日開大會時，必定會去試吓。
卓妮都叫咗一份西多士連凍奶茶盛惠十九蚊，價錢算係適中，個西多士整得唔錯，一句講晒：值得一試。