中環出更：活化軍火庫 四億埋單
亞洲協會香港中心復修前英軍位於金鐘正義道嘅軍火庫逾十年，下月九日終於正式啟用，協會主席陳啟宗更加會粉墨登場，連續兩日擔任星級導賞員，親身向市民介紹軍火庫嘅特色及活化後嘅用途等。
陳啟宗同卓妮講，自己用咗成擔心機去搞個軍火庫，活化工作遠較想像中困難，因為嗰度原本爛溶溶，協會九九年接手後，原本都估計要用兩億元活化，協會揼咗馬會心口獲資助一億元，諗住可以蝕少啲，點知起起吓發現嗰度啲大樹有果蝠要保育，啲空調系統又要收收埋埋，以免影響建築物外觀，結果要掘個六米深坑埋咗佢，最後不但遲咗完工，埋單更要成四億，仲未計每年三、四千萬嘅營運費。
陳啟宗話軍火庫分開幾組建築物，地下會作訪客中心及食肆等，對外開放。至於軍火庫則會改作畫廊及表演廳，因為軍火庫銅牆鐵壁，設計又冇乜陽光射入，最適合放置要高度保護嘅名畫，畫廊入場費要收卅元。