中環出更：王梓軒奪獎 星爸High爆
前晚無綫舉行嘅樂壇頒獎典禮上，全國人大代表王英偉（Wilfred）囝囝王梓軒（Jonathan）勇奪傑出表現獎金獎，做星爸嘅當然戥個仔高興。卓妮尋日喺香港會見到Wilfred，即刻上前恭喜佢，佢自言開心過自己攞獎，不過一家人就未有慶祝，因為囝囝太忙喎。
出謀獻策 北望神州
Wilfred話，囝囝太忙，莫講話慶祝，連一家人坐低食餐飯都幾難。好在Jonathan有個廿四孝爸爸，出道兩年以來，Wilfred唔單只百分百支持同體諒，更加為囝囝出謀獻策添。
從商經驗豐富嘅Wilfred認為，喺香港做歌手同做生意一樣唔容易，市場細之餘，觀眾口味又單一，所以要北望神州，首要開拓鄰近嘅廣東市場，以粵語歌做主打，繼而逐步走向全中國，再衝出亞洲，依家囝囝已經慢慢凝聚咗一班日本粉絲。佢透露，Jonathan下一步會出國語碟，唔知遲啲會唔會出埋英語同韓語專輯呢？