中環出更：中樂團籌款 靚聲王齊騷Quali
緊貼時代潮流嘅香港中樂團，上周六夜晚喺尖沙咀文化中心首次舉行籌款音樂會，獲得城中名人熱烈撐場。歌唱水準媲美唱家班嘅教統會主席鄭慕智（Moses）、「AO歌王」民政事務局常任秘書長楊立門等靚聲王齊齊獻唱，眾人聽到入晒神，大呼過癮，成晚話咁易籌到二百萬元善款。
中樂團理事會主席徐尉玲（Carlye）、副主席梁廣灝一早到場迎賓。兩人均悉心打扮一番，Carlye着住香港名牌「源」出品嘅長衫，梁廣灝就幫襯「上海灘」，令現場增添唔少中國味。眾多城中名人攜眷嚟撐場，包括行政會議成員張建東夫婦及囡囡、鄭慕智夫婦及囡囡、前立法會議員楊孝華夫婦、公開大學校長梁智仁夫婦等，氣氛好熱鬧。
是夜獻唱嘅名人莫不搞搞新意思。楊立門唱流行曲唱得多，當晚首次獻唱好懷舊嘅《禪院鐘聲》，博得滿堂喝采。前馬會主席陳祖澤同埋老拍檔甘何淑儀就演繹英語粵曲《帝女花》之香夭，英文歌詞更加由陳祖澤親自撰寫。兩人將男女主角殉情前蕩氣迴腸嘅愛情故事，唱得好淒美，大家聽到入晒神。
鄭慕智唱歌神名曲
唱功一流嘅Moses壓軸演出，佢引吭高歌兩首中文歌，包括歌神張學友嘅《你的名字我的姓氏》，將眾人耳熟能詳嘅流行樂曲重新演繹，確係不同凡響。Moses話自己唱慣意大利文，今次係特別為佢編曲，唱番中文歌，佢都覺得幾好聽。
卓妮