外判商用舊車 水署做水魚

外判客貨車負責每日運載水務署員工及工具出入各區，前往不同工作地點檢查及維修，但部分車輛卻明顯殘舊，「我見水務署份標書講明架車唔可以舊過○四年，點知一開工就發現好多人都係揸緊舊車！」客貨車司機阿勤（化名）指承辦商開舊車企圖「渾水摸魚」，對其他自購新車的司機並不公平，水務署未有監督外判商恪守合約規定，亦有浪費公帑之嫌。「之前我見過有司機嘗試揭發外判商用舊車，結果就畀人炒咗，搞到人人都唔敢出聲！」

水務署發言人承認，當局早已知悉有客貨車未符標準，已根據合約要求承辦商跟進，強調倘承辦商未有在限期內糾正問題，當局會終止合約。發言人續稱，合約規定，承辦商使用的車輛首次登記日期須在○四年四月一日或以後，而合約對載客及載貨量等亦有要求。

發言人又說，上述外判服務耗資一千九百五十九萬元，按合約會定時通知承辦商每天所需的車輛數目，最多使用客貨車數量為七十七部，但當中只發現三部車輛未符車齡條件要求。

《東方》發現後舊車數目銳減

不過，根據記者兩度前往水務署其中一工場了解所得，現場所見已發現最少有四部「超齡」客貨車，最舊的一部更達十五年車齡。發言人事後解釋，本報發現的四部客貨車乃該署為應付額外運輸而另行聘用，並不在合約範圍，故沒有車齡限制。

「啲舊車開頭起碼有二、三十部！話咗畀《東方》知先少咗，但係都仲有幾部行緊啲偏遠地方！」阿勤直指實際舊車數目遠比署方所述為多；至於上述四部「超齡」客貨車是否非合約範圍，阿勤則反駁說：「架車係咪喺合約入面根本冇人知，都調到亂晒，佢話乜都得啦！」

立法會民政事務委員會委員陳淑莊直斥署方有縱容承辦商之嫌，而使用違規舊車更明顯浪費公帑，「合約要咁貴價錢一定有原因，如果承辦商畀唔到相應嘅服務，水務署又唔去管，咁要合約嚟做乜？」陳促當局加緊留意承辦商是否有切實履行合約條款，若未能於限期內糾正問題，便應果斷懲處。