立法會絕大多數黨派同議員，都對中電嘅「假讓步」拒絕收貨，唯獨係由自由黨分裂出嚟嘅經濟動力，就搶先出稿歡迎中電調低加幅。
其實大家只要睇番○八年一月政府同兩電簽訂新一份利潤管制協議後嘅立法會會議記錄，就會發現當時仲係自由黨成員嘅經濟動力議員梁君彥，當年亦都係獨撐政府同兩電，強調百分之九點九嘅准許回報率合理！所以依家佢哋迅速變臉一啲都唔奇。
除咗經濟動力，本港其中兩大商會香港總商會同香港工業總會，亦係微調公布後迅速發稿大讚中電，與日前聯同另外兩大商會聯手向中電施壓完全唔同晒。梗係喇，總商會同工總嘅立法會代表正係經濟動力嘅林健鋒同梁君彥，自然鬧得快、讚得更快喇。