政情：五議員結伴 以色列朝聖
民主黨黃成智、民建聯李慧琼（Starry）、專業會議梁美芬（鼠王芬）、同埋「五散人」嘅會計界陳茂波（Paul）與資訊科技界譚偉豪（IT豪），五位政治立場大異、理應大纜都扯唔埋嘅立法會議員，上周五竟然一齊去咗以色列旅行，令人難以置信。原來佢哋除咗大家都係人類之外，仲有一個共通點嘅，就係五位都係虔誠基督徒。今次五人結伴去以色列，正係為咗去「神聖之河」約旦河朝聖。
特首參選人梁振英同唐英年連日隔空開火，屬於梁營嘅Paul同IT豪，竟然同早前帶唐英年落區嘅李慧琼去以色列，喺立法會九龍西直選直接競爭嘅Starry同鼠王芬亦同行，加埋今次行程中唯一一位泛民代表黃成智，呢個組合認真趣怪。宗教無界限，呢句話真係冇錯。以色列嘅約旦河係耶穌受浸之地，每年都有數以十萬計教徒前往朝聖，相信呢個都係五位議員今次嘅必到之處。唔知佢哋洗滌完心靈後，會唔會放下政治成見、以後鬧少啲交，攜手合作為港人謀福利呢？