政情：根哥鬍鬚聖誕卡勁爆笑
聖誕節又到喇！唔知今年大家收到幾多張聖誕卡呢？代表漁農界嘅民建聯立法會議員黃容根，前日送嚟一張爆笑指數極高嘅聖誕卡，事關卡內嘅聖誕老人就係根哥自己，見到佢一臉靦覥咁扮成聖誕老人，真係有啲於心何忍。
實情根哥張聖誕卡嘅設計非常平實，聊聊一句「祝各位聖誕快樂、新年進步」，已經感受到何謂物輕情義重。不過根哥一身聖誕老人裝束，上半身斜斜地突出嚟，伸手指住啲祝賀語句，加上佢背後配以「呵呵呵呵~」嘅聖誕老人招牌式笑聲，真係莊諧並重。更搞笑嘅係根哥唇上平時留有嘅鬍鬚，喺聖誕老人嘅白鬍子下驟變成鬚根。
另一邊廂，近期因加電費問題而令人氣急升嘅環境局局長邱騰華，亦出現喺聖誕卡中，不過就係被人惡搞嘅。關注公帑運用團體「107動力」借用環境局嘅聖誕卡串爆邱騰華，諷刺由佢推行嘅膠袋稅、停車熄匙、電器稅同加電費，統統都係環保騷！