中環出更：遊戲展玩Cosplay 台美女組合爆燈
受到日本潮流文化所及，東瀛嘅電玩與漫畫不但深入民心，連Cosplay（角色扮演）呢種玩意都漸漸廣受歡迎。一眾好此道者就趁亞洲遊戲展聚首一堂，仲嚟個中港台大比併！由潮流達人項明生（James）擔任評判，兼且飾演漫畫角色玩埋一份。不過無論佢扮得點出色，都畀最後擊敗內地同本港參賽者嘅台灣美女Cosplay組合搶晒風頭，再次證明玩Cosplay始終都係女性佔優！
玩咗Cosplay都有五六年嘅項明生，第一次係扮演三國角色呂布，當時諗住為遊戲展做生招牌，不過就好擔心鬼五馬六嘅裝扮，會成為同事嘅笑柄。但佢後來發覺透過角色扮演，玩遊戲時會更加投入，更容易同機迷打成一片，愈玩愈上癮。
項明生扮柯南外表滑稽
今次James扮演嘅係著名漫畫《名偵探柯南》主角江戶川柯南，身材高挑嘅佢為咗呢個角色，穿上一套小學生校服，外表頗為滑稽。James話睇咗套漫畫好幾年，覺得自己同漫畫主角嘅相同之處，就係長唔大，而正因為童心未泯，就能夠度出新橋段嚟迎合電玩市場。
雖然柯南嘅衣着相對簡樸，但係James都為呢個角色而花咗成個月時間籌備，例如身上嘅藍色校褸與灰色短褲，都係搵裁縫師傅度身訂造，再加上大框眼鏡、特大紅煲呔與及偵探必備嘅放大鏡，效果都好滿意。不過喺寒冬之下着呢套裝束，James嘅雙腿就難免受罪。
今次Cosplay比併將遊戲展氣氛推向沸騰。James話往年嘅遊戲展，只得本地Cosplay愛好者同場切磋，今年為咗拓寬大家視野，專程邀請內地與台灣嘅愛好者參與。結果台灣女子三人組因擁有天使面孔與魔鬼身材，甫上台即轟動全場，作為評判嘅James亦順應民意，頒咗個人氣爆燈獎畀佢哋。不過，James亦好欣賞一位扮演關二哥嘅內地參賽者，事關呢位仁兄為求最佳效果，裝扮不惜工本且將皮膚抹紅，所以都獲頒發獎品予以鼓勵。
卓妮