嗱嗱嗱，再一次證明眾怒難犯。打算瘋狂加價嘅中華電力終於向群眾壓力低頭，宣布明年電費加幅由原本百分之九點二調低至百分之七點四。經過調整之後，三成住宅用戶電費開支不變，八成用戶每月電費加價少於二十二元，增幅大約百分之四點六。
原本態度傲慢嘅中電怯於群情洶湧而腳仔軟，值唔值得高興呢？本來電費調低加幅都算係一件好事，之不過咁，有立法會議員踢爆咗一個大陰謀。中電調整加價幅度嘅主要數據來自燃料帳負結餘，由原先預計嘅八億幾元提高至十四億元。議員就話嘞，提高燃料帳負結餘之嘛，基本電費加幅冇變喎，仍然維持百分之六點二。換言之，中電玩數字遊戲，今次只不過係暫時壓低加價幅度，將來隨時會追加補數。
咦，功夫茶忽然之間想起一則成語故事「朝三暮四」。故事係咁嘅，戰國時代有一個養咗一大班猴子嘅狙公，因為手緊而計劃減省開支，所以就同猴子商量，以後早上餵三隻蕉，晚上四隻蕉，得唔得呀？猴子一聽怒不可遏，梗係唔得啦！聰明嘅狙公就轉口話嘞，好好好，以後早上餵四隻蕉，晚上三隻蕉，得唔得呀？猴子一聽早上多咗一隻蕉，滿心歡喜答應咗。
好明顯，被稱為「電霸」嘅中電將消費者當作猴子咁耍，瘋狂加價你唔答應吖嘛，好好好，今次改為加少啲，以後慢慢再加過。總而言之，中電係要賺到盡，你吹咩！
再講吖，即使電霸唔係喪玩朝三暮四嘅把戲，加幅仍然不可接受。學似幾位異口同聲嘅立法會議員話齋，中電只係些微讓步並不足夠，因為加幅仍然高於通脹，未能回應市民訴求。有人甚至呼籲市民延遲交電費，以示「我真的憤怒鳥」。自由黨飲食界議員張宇人更加形容為「好離譜」，食肆每月平均繳交十至二十萬元電費，將來每月要多付幾千至一萬元實在惡頂。
唉，講到尾始終係官僚廢柴累街坊。唔係咩？所謂利潤管制實際上係利潤保證，政府容許電力公司有權得到百分之九點九九回報，既然皇恩浩蕩御准牟取暴利，電霸唔賺到盡都傻啦！
總而言之，中電調低加幅並不值得高興。喂，加幅仍然高於通脹確係離譜啫，而且咯喎，難保中電唔會喪玩把戲愚弄消費者。咁啦，難得民意同官意一致，弱勢政府好好睇睇叻番一次，繼續向中電施壓要求再降低加幅甚至維持原價。你知啦，民望極低嘅曾蔭權政府時日無多，執番個尾彩都叫做冇咁醜死怪吖！