中環出更：郭少明再戴博士帽
尋日公開大學頒授榮譽博士學位，莎莎國際控股主席兼行政總裁郭少明獲頒榮譽工商管理博士，一家大細同老友們都嚟捧場。好似保良局副主席顏金煒同總理陳正欣夫婦、Neway二少薛嘉麟、名媛林李婉冰等，都爭住恭喜佢。
「加租好過減租」
郭少明○八年已獲嶺南大學頒授過榮譽博士學位，今次再戴博士帽，佢自言非常高興。坐擁時值一百三十億元化妝品零售王國嘅佢話，自己學歷唔係高，語言能力又唔係好，有今時今日咁嘅成就，全憑勤奮上進加靈活嘅頭腦，衝破重重難關。不過佢話，依家時勢唔同咗，內地十幾億人口，競爭咁激烈，冇番咁上下學歷同知識，都幾難發到圍，鼓勵大家要終身學習。
近期舖租貴得驚人，郭少明反覺得加租好過減租，皆因加租反映市場經濟向好，經濟差先至會減租啫。佢話寧願自己諗計仔增加客源同改善服務質素，都好過愁冇客到喎，又話公司明年一定有人工加。
同場獲頒榮譽博士學位嘅政商界名人仲有前教育資助委員會主席林李翹如、本地著名小說家劉以鬯，以及國務院國有資產監督委員會首任主任李榮融。