中環出更：胡啟泰父子煙花賀壽 泰王happy
泰王蒲眉蓬本月初時八十四歲生日，舉國歡騰。日前喺芭堤雅連放多枚巨型煙花慶祝，創下健力士紀錄。盛事背後，多得香港人，有「煙花界黎明」之稱嘅胡名揮（Christopher）參與當中，專業及資深行政人員協會理事楊素珊（Susan）就擔任煙花比賽評判，齊見證呢幕世紀煙火。
今次煙花壯舉，由香港榮聲集團負責，榮聲主席胡啟泰（Francis）來自煙花世家，曾多次參與香港賀歲煙花匯演，經驗十足，呢次夥拍公子Christopher搞國際大騷，全行矚目。Francis同泰王好有緣，五年前對方慶祝登基六十年，首次策劃煙花騷。四年前泰王八十歲生日，又冧莊搞多一次。
今年八十四歲壽辰，泰國更重視。煙花匯演於十七日晚舉行，七枚直徑廿四英寸、各重一噸嘅大型煙花彈同時向上空發放，跨越超過四公里，幾乎超越整個芭堤雅海灘。泰王為保安理由，只可以安坐王宮睇直播，但據聞佢睇見煙花放射出滿天黃金雨，happy到極，事關金色係佢至愛。
楊素珊睇比賽 開心到失眠
整場煙花騷耗資約三百萬美元，連珠炮發令Susan都睇到目瞪口呆。佢話許願都許唔切喎。
國際大型煙花比賽都同場舉行，來自十四個國家嘅煙花賽代表，分兩日拗手瓜。Susan有份擔任評判。佢話，睇見上空發放超過五萬枚煙花，開心到瞓唔着。旅遊業議會副主席徐王美倫同香港迪士尼高層都去取經。話唔定香港將來都有機會搞番次喎。