政情：講錯麵粉廠執笠林鄭認衰

林鄭尋日講開今年第四季賣地計劃時，突然喺尾段尷尷尬尬主動話要講番九龍麵粉廠疑似「執笠」事件，佢承認自己當時搞錯咗，澄清九龍麵粉廠未執笠，又話對事件引起廠主及工友不便公開致歉。佢話已經透過古物諮詢委員會主席陳智思聯絡咗廠主，希望可以安排到廠房參觀，不過廠主話呢排十分忙碌，唔得閒招呼佢。

林鄭近排好似經常講錯嘢，佢尋日話今年賣地計劃中抽起荃灣及元朗兩幅限呎地，交咗畀運輸及房屋局起置安心資助房屋計劃，但其實有關地皮係起新居屋，唔係置安心計劃。