香港足球代表隊嘅世界排名，最近跌到去歷史新低位，去到一百六十八位。金融服務界議員詹培忠好勞氣點解香港足運咁差，尋日喺立法會提咗條質詢。點知民政事務局局長曾德成答答吓爆響口，話現時足總已經改革咗好多，加入咗唔少正派人士做董事。咁樣講法，咪即係暗示以前足總董事好多都唔正派？
其實香港足運走下坡唔係今日嘅事，最近排名跌到歷史新低，先引起外界關注。
德成局長解答金勞詹嘅疑難時，已經講咗未來三年會預留二千萬畀足總推行改革，而足總嘅會長同會董，都分別加設年期，唔可以無限連任。
講講吓，德成局長話，現時足總加入好多正派人士，好似前入境事務處處長白韞六等，即係話以前嘅董事唔係正派人士啦。最慘在場無人幫足總講好說話，老公係足總主席嘅紡織及製衣界議員梁劉柔芬無出聲，而體育、演藝、文化及出版界議員霍震霆可能因為屋企爭家產風波而缺席會議，德成局長亂講嘢，都無人幫佢兜。