政情：三無周松崗 從政怕怕

周松崗尋日同傳媒茶敍，被問到有冇被招攬加入梁振英及唐英年兩名特首候選人競選團隊，佢趕快強調自己無意從政，又反問記者由從商轉做從政做官嘅成功例子有邊個。周松崗話自己唔適合從政，認為工商界講求過程，而政治家則着重結果，若急於取得結果，過程中就好容易出錯。

退休唔沾手政治，周松崗都不愁寂寞。佢依家係三間機構嘅非執行董事，未來會做多兩、三間，亦會考慮做公職，當然都要好好享受退休生活，例如去中東旅行、睇書，最重要會留喺視為「家鄉」嘅香港。

周松崗喺未加入港鐵前，曾經做過化工、地產、銀行等唔同行業，唯獨對從政耍手擰頭，唔通真係畀○七年嘅提名風波嚇親？事緣當年周松崗提名陳淑莊參選中西區區議會山頂選區，挑戰競逐連任嘅自由黨林文傑，因而激親田少，田少覺得佢敵友不分，又話佢應該有政治智慧。周松崗為平息田少怒火，最終向田少致歉，又承認自己政治敏感度不足。喺嗰次選舉，陳淑莊勝出。

加電費唔影響票價

至於身為兩電大用戶嘅港鐵會否因加電費而要加票價，周松崗則大派定心丸，話雖然能源成本佔港鐵總成本好大比例，但能源價格並唔係屬於釐定票價嘅可加可減機制內嘅考慮因素，所以兩電加價唔影響港鐵車費。

回顧八年喺港鐵工作，他形容有喜有悲，最難忘係○四年港鐵嘅縱火案，而令佢感遺憾係離任前未能睇到沙中線獲得撥款，希望明年中能順利通過。新行政總裁一職將由前紐約大都會運輸局主席韋達誠明年一月起接任，周松崗寄語韋達誠須認識香港文化，了解港人需求。至於港鐵推出嘅「搭一百、賞一票」推廣期將於明年元旦日結束，會否將優惠延長，周松崗就話交畀繼任人決定，即刻將個波拋畀韋達誠。