香港喺全國最安全城市排名三十強不入，國際都會淪為危城，好多人以為係爆冷，其實係實至名歸至真。花園街奪命大火暴露嘅消防安全問題，只不過係冰山一角，本港到處都市炸彈，隨時隨地都會發生悲劇。
呢，近年涉及獨留兒童嘅悲劇就不時發生喇。本月初，香港仔一名四歲女童喺媽媽落街買餸時爬出窗外，由十樓墮下死亡；更早前，旺角有位六歲男童被獨留家中，企喺三樓窗前呼喊媽媽，差啲墮樓，好彩警員及時趕到，執番條命。
類似事件接連發生，證明咗一件事，就係兒童託管服務嚴重不足。雖然當局已經將俗稱社區保母計劃嘅「鄰里支援幼兒照顧計劃」常規化並擴展至全港十八區，但名額不足，分布唔合理，杯水車薪，根本止唔到咳。無暇照顧子女嘅基層父母求助無門，惟有抱住僥倖心態博一博，結果咪經常博出禍咯。
本報記者直擊多個獨留兒童「重災區」，發現兒童託管服務簡直一位難求。好似葵涌區咁，提供暫託服務嘅幼兒機構得九間，合共二十一個託位咁大把，部分機構預約要等到明年先至有位，問你服未。仲有吖，如果家長有急事，臨時想搵人幫手湊細路，居然要提早成個月預約。託管變咗托手㬹，咁嘅服務似靠害多啲。
有社工批評話，現時提供兒童託管服務嘅機構唔多，而且分布唔平均，位處偏僻嘅使用率低，交通方便嘅就爆晒棚，建議當局增加託管機構及名額，並借鑑日本經驗，喺交通方便地點設託管服務中心。
其實，託管服務不足已經係老大難問題。有社福團體較早前調查發現，由於受資助託管服務短缺，七成受訪中小學生今年暑假曾被獨留家中，約一成更加日日被獨留屋企。無計喇，當局唔肯增加資源，私人託管服務郁吓每月幾千蚊，而且時間欠彈性，根本幫唔到基層父母。
生命大過天，獨留兒童慘劇一宗都嫌多。其實，政府庫房水浸，只要撥少少錢增加託管服務，就可以為唔少家庭解除後顧之憂，大人及兒童都可以受惠，如果連簡單嘅事都唔肯做，以後就唔好再吹「以民為本」喇！
一句講晒，港府缺嘅唔係資源，而係為市民排憂解難嘅心。施政以民為笨，香港唔止變成死人冧樓、劏房大火、塌樹殺人、招牌攞命嘅危城，更加係幼無所託、老無所依、死無所歸嘅悲情城市。難為煲呔曾仲呼籲每對夫婦最好「生三個」喎，簡直九唔搭八！