今屆特首選舉委員會選舉中，會計界戰況相當激烈，經過一番惡鬥後，不論來自邊個陣營嘅人都有成員當選，可見會計界選民嘅光譜相當闊，估唔到呢個狀態會蔓延到香港會計師公會改選。公會日前選出新正、副會長及理事會，無論疑似梁營或唐營嘅支持者都有人當選，唯獨唔見有泛民主派嘅選委當選。
會計師公會前日舉行周年大會，選出安永會計師事務所亞太區金融服務管理合夥人包凱做會長。人所共知，力挺特首參選人唐英年嘅醫管局主席胡定旭，正正係出身自安永，順藤摸瓜，包凱好有可能都係唐營支持者。
疑似挺梁亦大有人在，兩位新副會長趙麗娟及陳錦榮，參選選委時獲表明挺梁嘅立法會會計界代表陳茂波支持。此外，首次當選公會理事嘅林智遠，更係來自陳茂波牽頭嘅「票在你手」選委名單，可見疑似挺梁嘅選委，已經鎮住咗公會。至於連任公會理事嘅龔耀輝，當選選委至今未表態挺梁定挺唐，咁係咪可以將佢界定為中立呢？