政情：黃進達無懼師傅打對台
康泰旅行社前一姐劉美詩（Susanna）久休復出坐鎮「專業旅運」高層，睇怕業界都唔敢鬆懈，但佢徒弟兼康泰太子爺黃進達（Jason）就話，唔怕同師傅拗手瓜，認為多啲良性競爭係一件好事喎。
Jason日前出席聖誕派對時，講起師傅Susanna過檔再戰旅遊業界，佢話個幾月前已得知消息，亦曾力邀師傅回巢，但師傅話自己修讀碩士時專修市場學，希望學以致用，所以擔任專業旅運市場及業務發展總經理，正合晒心意。不過，同行如敵國，要同師傅打對台，有冇壓力？Jason就淡定擰頭，佢話同師傅相處多年，早有默契，將來或有更多合作都未定。
今年聖誕旅行團好旺場，好多一早已經爆滿。Jason話，台灣、韓國及泰國團今年大旺，當中以台灣最吃香，唔使問都知，係多得一齣台灣愛情片大賣帶挈；另外，泰國團都好抵玩，自從經歷水災後，唔少五星級酒店紛紛以筍價搶客，好抵住喎。