政情：金刀梁畀老婆逼放大假
一個星期後就到聖誕節，天文台預計今個冬天會特別凍，唔少人選擇外遊避寒，好似香港大學校務委員會主席梁智鴻（金刀梁），忙完今日港大百周年校慶晚宴後，月尾會同太太馮令儀飛去斯里蘭卡玩四日，睇吓當地嘅名勝古蹟喎。
梁太自爆今次旅行係逼金刀梁請假，事關金刀梁今年忙到甩轆，成年都冇放過大假，係時候好好休息吓。不過，今次唔係享受二人世界，仲有囝囝及一大班老友同行。梁太話，囝囝做酒店發展，成日唔喺香港，一個月見到一次已經好好，有得一齊旅行自然更加開心。
不過，工聯會立法會議員黃國健（KK）同港區全國人大代表霍震寰都話聖誕節唔去旅行。KK話，要部署明年立法會選舉前期工作，四月工聯又換屆，遲啲仲邀請幾位特首候選人上論壇，睇嚟明年底先至可以放大假囉！至於霍震寰就要飛北京開會，佢話太太好多節目，唔得閒去旅行喎。