政情：公專聯組黨 飛起公文袋
公共專業聯盟自○七年成立至今，一直被認為係公民黨嘅衞星組織，因為公文袋副主席黎廣德一直係該聯盟主席，經常以聯盟名義發表言論。不過，隨住黎廣德夠鐘卸任，新任主席莫乃光即刻發威，喺選委會選舉成為資訊科技界（IT界）票王，副主席梁繼昌亦帶領會計界全取九席，成績亮麗。兩大誘因下，聯盟內部已醞釀自立門戶，有人建議索性飛起公民黨，成立一個主攻功能組別嘅泛民主派政黨，變成泛民版嘅經濟動力。
黎廣德以往公開發言時，通常都唔止用公民黨一個身份，仲會用埋公共專業聯盟個名，因而被批評「黨政不分」，引起唔少聯盟成員不滿。有聯盟成員仲話黎廣德唔鍾意聽人意見，處事手法亦唔夠圓滑，所以上次聯盟換屆選舉，已進行「去公民黨化」，踢走黎廣德，連副主席都唔畀佢做。
有聯盟核心人士透露，聯盟現時大部分成員都有泛民背景、無黨派嘅專業人士，各個重要職位中，只有郭榮鏗仲係公民黨黨員，反映「去公民黨化」已經做得七七八八，所以聯盟內好多人一早萌生自立門戶嘅念頭，費事畀外界認為聯盟仲係公民黨嘅衞星組織，難以繼續發展，簡單啲講即係擔心會被公民黨搭沉船。
原本佢哋都擔心單憑聯盟嘅實力，另組政黨會唔夠號召力，但經過選委會選舉一役後，成績有目共睹，令所有擔心一掃而空。
主攻功能界別
聯盟派出副主席梁繼昌合共九人出戰會計界，結果全數當選，成績較現任立法會議員陳茂波支持嘅隊伍「票在你手」仲好，足以證明聯盟喺會計界有一定支持度，仲有講法話，梁繼昌明年參選立法會越級挑戰陳茂波，未必無機會。
至於聯盟主席莫乃光，更加係IT界票王，但莫乃光最叻嘅地方，係唔只自己贏到，仲幫埋十九名隊友同時喺IT界勝出，今後有十九名堅實選委做樁腳，莫乃光明年立法會捲土重來撼贏建制派嘅譚偉豪，絕對唔係天方夜譚。如果呢個如意算盤打得響，聯盟組黨後，已經喺立法會有兩票，如果再搵到新人加入，實力不容忽視。