中環出更：陳晴鍾情夏姿 細膩中國風
聯合國兒童基金香港委員會主席陳晴（Judy）人靚聲甜，舉手投足之間，總係散發着溫柔婉約嘅氣質。卓妮日前喺個活動見到Judy，佢着住台灣名牌時裝「夏姿」出品嘅中式織錦長袍外套，驟眼望落去有好濃郁嘅中國風，卻又不失新潮時尚，令Judy變身為靚靚嘅中國娃娃。
「囡囡」拍拖 望做「外婆」
夏姿堅持將東方美學融入西方剪裁工藝，設計細膩，剪裁大方，難怪備受中港台靚女明星喜愛，歷久不衰。Judy都係忠實擁躉，佢話好欣賞夏姿嘅設計及刺繡做工十分精緻，布料質感又好，令佢愛不釋手。當日佢着住嘅長袍設計特別，亦係冬天禦寒嘅好拍檔。
自從一年前Judy做咗媽咪之後，就經常將寶貝兒子掛在嘴邊，外界似乎淡忘咗佢助養嘅大熊貓晴晴。視晴晴為囡囡嘅Judy爆料話，晴晴已有男朋友，係時候開枝散葉，佢希望明年可以升格做外婆喎！