中環出更：英皇書院列第101幢古蹟
於一九二六年落成嘅英皇書院被列入法定古蹟，係政府第一百零一項法定古蹟，尋日舉行古蹟揭幕儀式，一眾校友如特首參選人梁振英、前天文台長林超英及李本瀅等紛紛撐場，而兩位資深校友甘尚武及鍾香崇更以九十幾歲高齡到場欣賞英皇口琴隊表演，又大談昔日讀書趣事。
林超英話，好鍾情英皇嘅紅磚外牆及圓拱形結構，大讚係一座充滿生命力嘅古蹟，同時又大讚自己曾經工作過嘅尖沙咀天文台總部係另一個歷史建築，話可以同時喺呢兩個地方逗留多年，真係與有榮焉喎。林超英憶述，由於英皇同港大只係一街之隔，當年上堂上到悶嘅時候，同學之間就會講笑話不如擒上學校後面棵樹逃學。
李本瀅就話，由於自己只係喺英皇讀咗兩年書，對同學之間印象唔係太深刻，但佢就好欣賞英皇思想開放嘅特點，最難忘以前重紀律嘅校風，因為上堂要排隊先可以返課室。
至於1933年畢業嘅資深校友甘尚武就話，最難忘當年有兩個老師同時畀佢滿分成績，佢勉勵英皇學生要畀心機讀書，令英皇永遠排喺港島區第一。
林鄭難忘去男廁
主持揭幕禮嘅發展局局長林鄭月娥，原來當年都有諗過做男校女生，又話當年去英皇考試人有三急，老師專登開放咗個男洗手間畀佢用，令佢印象深刻。同場嘅CY都係英皇校友，佢話自己當年讀小學時已經畀英皇嘅外牆同建築風格深深吸引，仲立志要入英皇，但就畀當時細佢一歲嘅妹妹厲咗一眼，笑佢不知天高地厚。
卓妮