人哋做金手指，海關就甩手指，試問以後仲有邊個夠膽挺身而出舉報非法行為？
賭仔戒賭就話斬手指啫，功夫茶諗極都唔明點解紀律部隊經常遺失俗稱手指嘅ＵＳＢ記憶棒，甩手指嘅後果往往係將市民私隱洩露得一塌糊塗，絕對係害人又害物。呢嗱嗱嗱，海關又甩手指喇，機密情報一覽無遺。
話說有市民早前將一隻ＵＳＢ記憶棒寄交本報，表示內有政府機密。本報記者打開一睇，手指之內有四百幾份海關內部檔案文件，檔案內容除咗疑犯姓名、身份證號碼以及地址等等個人資料之外，亦有情報搜集報告。呢一隻手指相信屬於海關港口及海域科一名高級督察所有，聽講呢一個懵到上心口嘅失主已經向警方報案。當中最少有四十份印有「機密」字樣嘅文件，十幾份係海關接獲舉報人士提供嘅敏感資料。其中一份係東區區議會副主席鍾樹根於○九年十二月嘅舉報，講到漁民投訴有香港油船非法販賣紅油畀大陸船隻。
如果你係頂證犯罪行為嘅金手指，一旦發覺自己好似剝光豬咁冇晒私隱，你會有乜感想呢？鍾樹根就話嘞：「真係好驚、好擔心！海關點解會咁疏忽？咁樣對我哋好危險㗎！我係公眾人物都尚且咁憂慮，如果係一般市民咪仲擔心？咁以後仲邊有人敢向海關舉報？」
冇錯，驚係人之常情，你試下洩露海關關長張雲正嘅個人資料吖，佢都一樣會好鬼死驚，話唔定驚到自我閉關。海關身為紀律部隊簡直全無紀律可言，好彩拾獲手指嘅市民係寄交本報啫，萬一賣畀作奸犯科嘅大壞蛋，唔知幾多人將會變咗「金翅大鑊鳥」。
講開又講，其實唔止海關係不守紀律嘅紀律部隊，警方洩密更加得人驚。○八年至今，警方有超過三十宗資料外洩個案，涉及三百份文件，大多數透過分享軟件FOXY披露，涉及小市民個人資料不計其數。所以話啫，一提警方，你好驚慌，就係咁解。
講番今次海關甩手指吖，發言人話喎，部門備有「資訊科技保安指引」，如果員工有需要將機密文件帶回家中，必須事先獲得批准。海關發言人仲話，若然發現有人違反指引，會按既定程序處理，包括紀律處分。
計功夫茶話齋，紀律處分無疑係正確，不過餐餐只係處分蝦兵蟹將係冇用㗎，一定要處分高層先至有足夠嘅震懾力量。喂，警方都處分過好多人啦，洩密事件咪一樣陸續有來。不如咁啦，海關關長張雲正自己處分自己，然後再向下發出死命令，機密不可洩，否則職位撤！