政情：發叔復仇踢走何君堯
我哋早前寫過，特首選舉委員會鄉議局界別有廿八個議席，但最後就有成三十人報名參選，唔似上屆咁經協調後和諧自動當選，需要投票定勝負，當中最勢危就係取代鄉議局主席劉皇發成為屯門鄉事委員會主席嘅律師會會長何君堯。尋日朝早點票結果一出，何君堯真係輸咗，除咗再次證明本報嘅料又堅又準，亦反映發叔精心部署今次選舉，上演一場復仇記。
今次鄉議局選委戰中，最高票係現任離島區議會主席周玉堂，有成一百零九票，可能係佢老人家德高望重。至於其他當選選委就算唔過一百票，最少都有八、九十票，例如發叔個仔劉業強就有八十九票，算係中規中矩。唯獨係何君堯只得六十一票，要同得票相同嘅鄉議局顧問梁和平抽籤定輸贏，最後仲唔好彩抽輸咗，即係連個天都幫埋發叔。另一落選嘅係長洲鄉委會主席翁志明。