政情：方保僑邊點票邊慶生
選委會選舉結束，泛民主派喺資訊科技界嘅三十席中取得二十席，當然值得慶祝，但要數最開心嘅，就係公共專業聯盟成員方保僑（Francis），原來前日佢生日，成班泛民候選人就喺點票期間同佢一齊切蛋糕慶祝。不過，班泛民候選人擺咗個大烏龍，一共買咗三個蛋糕，所以Francis希望泛民喺選委戰大勝嘅願望就許咗三次，唔怪得今次泛民贏得逾二百個選委囉！
不過，一心諗住將網民意見帶入選委會嘅網民力量名單，即使揼本請模特兒拍短片做宣傳，都係輸晒收場，仲要畀網民恥笑，一早買定佢哋會落選。今次喺資訊科技界慘敗嘅仲有亞視執董盛品儒，本來以為佢出動亞姐拉票好有睇頭，可惜最後都只係得一百一十三票，成為界別內得票最低嘅候選人，就連喺區議會選舉得四十二票嘅季詩傑都喺選委戰中攞到二百八十二票，贏佢近倍半選票。