政情：港大百年校慶請齊特首參選人
香港大學嚟緊周日會喺灣仔會展舉行百年校慶晚宴，估計有四、五千人出席，但最矚目嘅應該係佢哋請晒幾位特首參選人出席，包括梁振英、唐英年、民主黨何俊仁（鐵頭仁）、民協馮檢基及未宣布參選嘅新民黨葉劉淑儀。港大嘅公關話，邀請信一年前已發出，嗰陣時都唔知佢哋有意選特首，所以世事嘅嘢真係蹺。
港大公關話，一年前發信請「雙英」係因為佢哋分別係政務司司長及行政會議召集人，至於請鐵頭仁、馮檢基同葉太係因為佢哋都係港大嘅校友咁話，真係冇諗到咁蹺有意參選特首嘅人會咁樣聚首一堂。不過，佢哋五個都未應承係咪出席，所以會唔會同場過招都未知。
港大今次邀請嘅九成都係校友，仲有幾位可以話係人瑞校友，好似何東女子中學創校校長謝琮賢、港大前校長黃麗松、王賡武等。為咗慶祝港大百周年校慶，演藝界名人校友許冠傑、林夕同周博賢會為校歌重新編曲添。