政情：選委賽果出現名人效應
特首選舉委員會選舉只得廿三萬人有資格投票，名副其實係小圈子選舉，正因如此，好多選委候選人都少講政綱，一味叫人認住自己個嘜頭算數，所以選舉結果顯示好多票王票后都係社會星級知名人士。好似飲食界票王就係「蘭桂坊之父」盛智文，政協票后就係「阿姐」汪明荃，相信可以為今次唔關普羅大眾事嘅選舉，製造一啲茶餘飯後嘅吹水話題。
早前區議會選舉中，星級立法會議員輸到一仆一碌，但相反選委會選舉玩名人效應就好使得，好多都贏得票王票后美譽。好似批發及零售界，自由黨副主席周梁淑怡（莎姐）就力壓十幾人，成為得票最多候選人；而會計界票王，就由資深會計師李家祥奪得。李家祥同莎姐都係前立法會議員，唔知今次做票王票后，會唔會令佢哋心思思復出，明年強勢回歸立法會呢？
名人方面，不得不提飲食界。自由黨張宇人帶隊嘅十七人名單全數當選，最高票係公開挺唐嘅蘭桂坊之父盛智文，奪得七百幾票。至於政協界別結果亦令人感到意外，大家耳熟能詳嘅「阿姐」汪明荃成為該界別票后。不過，兩人分別幫飲食界同政協做過啲乜嘢，相信大家心裏有數。
張達明自稱「種票」
其餘界別最高票當選嘅，大多數都係知名度高嘅人，好似自由黨榮譽主席田北俊就成為商界（一）票王；醫學界票王就由醫學會會長蔡堅奪得。至於法律界票王，就係近期捲入種票疑雲嘅港大法律系助理教授張達明，佢仲講笑話啲票係種返嚟嘅。
「星味」最重嘅莫過於文化界，但由於無人競爭，所以全數自動當選，如果唔係，有人分分鐘可以同阿姐喺票數上一較高下。不過，就算做到票王票后都好，選委會選舉始終都係小圈子選舉，選委係咪真係能夠代表普羅市民選特首呢？相信市民心中有數。