中環出更：李家仁復古車 Q爆搶眼
山頂德瑞學校前日好旺場，皆因間學校變咗做特首選舉委員會票站，卓妮見到好多名人靚車，當中較為特別嘅係參選醫學界選委嘅「小明」李家仁醫生，佢揸住架九十年代嘅日產復古車去投票，夠晒搶眼。
全球限量二萬架
李醫生架灰白色復古車古典得嚟有啲Cute，原來係一九九一年日產（Nissan）Figaro FK10，全球限量二萬架。話說八年前李醫生有位行家朋友拎住本汽車雜誌去醫務所探佢，佢隨意掀一掀雜誌，就畀佢發現咗呢架車，即時一見鍾情，連價錢都冇睇就拍板，以三十五萬港元買咗返嚟。
Figaro係自動波開蓬車，汽缸容量只得九百八十毫升，車身的骰，座位比較窄。李醫生形容，呢架係「玩具車」，適合二人世界，一家大細去街就會揸其他車。呢架Figaro亦係李醫生拍攝自創歌曲MV嘅道具，曾經喺佢嘅《祝你健康快樂》歌曲作品中亮過相㗎。
李醫生最頭痛嘅係保養問題，由於係絕版車，好難搵到零件，原廠只承諾保養出廠後十五年，依家已經過晒期，惟有加倍小心，例如唔行多車嘅街道，唔泊架車喺街邊，避免整花架車。