中環出更：前議員遊新立會 有讚冇彈
廿幾個前立法會議員尋日暢遊添馬艦新大樓，個個有讚冇彈，一致盛讚新大樓又大又靚，簡直拍得住西方嘅國會大樓，又話好羨慕依家嘅立法會議員可以喺咁優美嘅環境下辦公。相反班現任議員成日投訴新大樓又大又唔好使，莫非要等到佢哋退落嚟之後、失去咗先至會覺得係好嘅？
前工業界議員丁午壽大讚新大樓又大又舒服，但就略嫌佢嘅位置唔係咁接近市民。丁午壽話，舊大樓位處中環心臟地帶，外形亦比較莊嚴，反而依家要行好遠先可以到達，要做好交通配套先得喎。
獲貴賓卡使用設施
至於前議員張有興就好關心會議廳大咗，會否對成日掟嘢嘅議員造成不便。不過，立法會職員就用番早前長毛向煲呔曾掟蛋嘅例子，話掟嘢絕對無問題，搞到大家笑到停唔到o架。
大家參觀之餘，秘書處仲喺宴會廳設宴招呼呢班勞苦功高嘅老臣子。正喺大家食緊飯嘅時候，立法會秘書長吳文華（Pauline）就透露咗一個好消息，就係行政管理委員會將會向班前議員每人派一張貴賓卡，等佢哋可以自由使用立法會入面嘅圖書館及檔案館。不過，有人就希望張卡可以畀佢哋享用埋個咖啡閣同停車場，Pauline就話會再考慮吓。
至於自由黨副主席周梁淑怡就去到新開嘅紀念品店，買咗兩本兒童圖書同杯墊送畀啲外孫做手信，佢大讚店內嘅紀念品既精緻又特別。秘書處亦都向班前議員送上鎖匙扣同散紙包，但就乘機向佢哋「搜身」，問佢哋有冇收埋啲有關舊大樓嘅相片，睇吓可唔可以割愛捐畀立法會，等佢哋可以放喺新大樓博物館入面等市民欣賞喎。
卓妮