開講有話，入鄉問禁。功夫茶好想明白，絡繹不絕來港瘋狂購物甚至衝閘產子嘅內地同胞，到底知唔知道香港有乜嘢禁忌？如果真係唔知，咁就要不厭其煩講多次，香港第一大禁忌係通街便溺！
呢一條禁忌真係婦孺皆知，男女老幼個個奉如金科玉律。無他嘅，香港雖然地方淺窄，不過搵廁所唔算過分困難，梗有一間喺左近。再加上本地人如廁文化擁有相對較高嘅教育水準，深切體會到狗狗先至會通街便溺，人作為萬物之靈唔應該將極密私隱嘅便溺動作暴露於光天化日之下。
呢嗱嗱嗱，內地同胞又成為網民熱烈討論嘅對象，事緣又有人見到懷疑內地女子，任由自己個女喺街邊放低幾両童子便，更加離譜嘅係完事之後竟然冇清理現場就拍拍屁股走人。當然啦，無圖無真相，網民拍下幾張照片傳上討論區，得到嘅評語係老實不客氣嘅連環抨擊，例如：「同放狗散步有咩分別！」
今次都唔知係第幾次揭發內地同胞做出損害市容嘅不雅行為，難怪有人形容香港「遍地黃金」。上月初之嘛，有網民將題為「內地遊客的小朋友在迪士尼花園施肥」嘅短片掟上網。記憶所及，遍地開花嘅黃金之選包括美輪美奐嘅商場走廊，以及人來人往嘅港鐵車廂。
講到內地同胞嘅騎呢動作，真係五花八門乜鬼都有。有冇聽過聖保祿醫院病房之內有人煮臘味飯同打甂爐？莫講話病房唔應該開爐玩煮飯仔，即使你入住酒店都唔可以咁做啦，萬一火燭好大鑊㗎。偏偏中華兒女硬係天不怕地不怕，荃灣港安醫院甚至有內地孕婦喺病房之內公然食榴槤，搞到房友聞到都想嘔。
功夫茶諗起，中國旅遊部門之前印過小冊子，教導內地同胞出外旅遊必須注意事項，例如唔好隨地吐痰，例如唔好大聲喧嘩，又例如唔好破壞公物。計功夫茶話齋，呢一類小冊子的確有超高嘅實用價值，不妨規定各個口岸向內地同胞每人派一冊。你知啦，人格影響國格，失禮香港人都算嘞，萬一去到歐美等等外國丟人現眼，中國本來已經殘破嘅國際形象恐怕要進一步墮落。
係呀，真係人格影響國格㗎，你睇下人哋歐洲人吖，待人接物彬彬有禮，缺德行為少之又少，所以歐洲形象從來唔會同「放狗散步」相提並論。
可惜功夫茶唔係中國大官，冇權下令全國人民再教育，惟有衷心貢獻幾句溫馨提示：人有人格，國有國格，若然不願失格，同胞萬勿賤格。
總而言之，入鄉問禁，入鄉問廁。當你掌握到廁所位置，咁咪唔使通街便溺咁醜死怪囉！