好多人覺得九十後唔勤力、唔上進，但只有十九歲嘅豪華飲食集團董事總經理陳嘉華（Jeffrey，圖）唔單只熱心參與社會公職，仲打算積極備戰，參選四年後嘅區議會選舉添。
家族做餐飲業嘅Jeffrey，自細就跟爺爺返酒樓，接觸地區多，令佢立志服務社區。佢話，爺爺同家人一向畀好多空間佢發揮，今次梗係力撐佢參選，爺爺仲叫佢專心備戰，四年內唔使返工，但糧就照出。
Jeffrey話為求獨立，小學一年級已經膽粗粗隻身飛去新加坡讀寄宿學校。嚟緊聖誕節，佢又同女友去獅城，原來係佢之前喺社團宴會上，幸運抽中來回機票，睇嚟佢同獅城真係幾有緣。
除咗想選區議員，佢仲想參加特首選舉委員會界別分組選舉，為試探民意，佢喺facebook限時徵求一百個like，如果夠數就會參選，可惜限時內未能達標，惟有下屆再諗喇。
