政情:黃傑龍攞傑青饒老送墨寶

出爐十大傑青尋日齊集會展領獎,叙福樓集團執董黃傑龍(Simon)都係得獎人之一。飲食界出「狀元」,多位食肆大老闆紛紛恭賀,國學大師饒宗頤送上驚喜,題字「仁者愛人」,言簡意賅,盡顯大師功力。

Simon獲獎,有份提名佢嘅立法會議員梁君彥親自到場祝賀。身為叙福樓集團大股東之一嘅爸爸黃耀鏗率領太太、新抱及孫兒嚟打氣,夠晒大陣仗。

原來饒老係黃爸爸世交,送上墨寶,認真畀面。尋日佢老人家無嚟,但真迹已用相架裱起,由Simon拎去晚宴會場,供大家欣賞。Simon話,「仁」字同佢好有緣,囡囡亦取名「可仁」,今後會以「仁者愛人」為人生座右銘。

肥亨同未來女婿好啱key

Simon又感謝人生路上貴人多,要將傑青個獎分畀大家。同場仲有中策集團主席馬時亨,肥亨本月廿六日嫁女,會否唔捨得?肥亨笑騎騎話唔驚,事關未來女婿同佢好啱key,嫁女後,反而多咗個仔喎。

「Money18免費即秒股票報價網站」現推出8升級功能,財經資訊,實時實發!