政情：孫公望朱古力餅興嘆
教育局局長孫明揚雖然患上腎衰竭，幾乎晚晚要洗腎，尋日星期日，佢同太太及孫兒行超市，享受天倫之樂，睇嚟精神都唔錯。
有讀者尋日行經鰂魚涌一個商場，咁啱撞見孫公一家行街街，時值晏晝兩點幾，商場人頭湧湧，好可能係因為大家啱啱食完午飯。
孫公夫婦兩人並肩行百貨公司，先睇衫，再睇玩具，對樣樣都有興趣，唔通想買聖誕禮物？可惜逛完一輪，未有心水，惟有轉戰超市。此時，孫公女兒及男孫加入，四人主攻掃食物。
本身有糖尿病嘅孫公望見貨架上有新到朱古力餅，一度眼甘甘，但諗起食甜嘢對健康無益，都係少食為妙。