政情：何鍾泰一箭雙鵰保議席
區議會選舉塵埃落定，各大政黨正部署明年立法會選舉工作，連功能組別亦暗戰連場，勢必掀起一場惡鬥。據聞立法會工程界議員何鍾泰（Raymond）為再度連任密密做工夫，早前落力為自由黨區議會選舉候選人助選，終於擊退由公民黨「空降」嘅黎廣德，原來佢在公在私都有所得益，Raymond呢招一箭雙鵰趕絕黎廣德，果然薑係愈老愈辣。
政圈一直有個說法，區議會嘅成敗對於明年立法會具有指標性嘅作用，好似重新「光復」山頂選區嘅自由黨總結後，已率先對外放風，話考慮派人參選港島、新界西同新界東。區議會選舉既是立法會直選嘅前哨戰，其實同樣係功能組別選舉嘅前哨戰。
有人總結區選成績後發現，自由黨喺港島區，特別多朋友出心出力幫手，好似中總議員黃宜弘，佢喺山頂選區就發動咗唔少好友同網絡，全方位幫自由黨候選人陳浩濂。自由黨喺山頂勝出後好矚目，其實另一個值得留意嘅係南區港灣選區，因為唔講唔知，原來喺淺水灣、深水灣等一帶住咗好多工程師，而Raymond就盡晒力，為自由黨嘅馮仕耕拉攏工程師支持，結果令公民黨嘅黎廣德僅取得三百多票，大敗而回。
其實Raymond前仆後繼幫自由黨，在公在私都百利而無一害，既可以賣個順水人情畀自由黨，又可以挫一挫黎廣德嘅銳氣，免除黎乘機聚集支持者強勢回歸工程界，即係挑戰佢嘅議席。
隨時畀工程匯抽後腿
不過，有業界中人語重心長話，Raymond除咗要留意黎廣德呢個工程界死敵外，仲要留意由工程師學會核心人物另起爐灶成立嘅「工程匯」，因為據聞佢哋一早睇準唔少業界中人，心中不滿Raymond長期霸住立法會個位，所以都心思思諗緊係咪搵人挑戰「抽佢後腿」。不過工程界喺好多次選舉都好多候選人，形勢愈亂，Raymond泰就愈穩，究竟面對內外夾擊嘅Raymond最後點樣見招拆招，化險為夷，大家就要拭目以待喇！