中環出更：白髮變黑 黃友嘉得咗

David前晚現身茅台夜宴，見佢一頭烏黑亮髮，睇落後生十年。搞過乜？原來係染髮。David話，日前行入髮型屋，本來諗住剪個靚髮，但望多兩眼，一頭白髮實在太礙眼，索性叫髮型師搞搞佢。個幾鐘後，白髮即時變黑，掂晒！係咪用咗「美×」髮彩就唔知嘞。

不逐名利 否認做官

點解依家至嚟染髮？原來有心嘅。David話，上任會長初期，都係老成啲好。但任期就滿，不妨大膽一試。盛傳David任滿後，會加入下屆政府做官，但佢否認，笑言不善追逐名利，寧願低調做政策研究。