中環出更：茅台之夜 豪飲千萬元美酒

五十年茅台珍稀，魅力之勁，吸引數百名人雲集。為求盡興，大會打破慣例，全晚無限量供應五十年茅台，滴滴是甘露。

佳釀入餚 食得招積

話明茅台夜，菜式離不開酒。茅台之友協會秘書長吳永嘉（Jimmy）同晚宴搞手之一嘅施榮忻（Jaime），吩咐廚師將茅台入餚，炮製瑤柱菜粒茅台炒飯、紅燒茅台乳鴿及茅台果凍，食得招積。咁落力，大會都頒番個「對茅台最有貢獻獎」，表揚兩人過去十年為茅台賣力。

貴州美女（左）餵貴賓施子清飲酒，認真體貼。	立法會議員梁劉柔芬（中）同老公梁孔德（左一）齊來趁高興，右二為立法會秘書長吳文華。	菁英會主席洪為民（右）同常務副主席楊華勇（左）狂掃三十多杯茅台，依然面不改容。

數全晚「酒聖」，非茅台之友協會監事長楊孫西莫屬。面對來勢洶洶嘅「隊酒」，仍然面不改容，仲拎出私伙珍藏六十年茅台，四圍請人飲。菁英會主席洪為民都唔弱，飲完三十幾杯茅台，仲識捉住老友談笑風生；副主席楊華勇就即場唸急口令畀卓妮聽，證明自己無飲醉喎。

晚宴上，有多支靚茅台拍賣。東華副主席施榮恆同保良局副主席鄭錦鐘（Eric）各自以三萬港元投得九一年出產嘅貴州茅台。Eric話，屋企已經珍藏近百支茅台，今次出價競投，只志在做善事。

查實茅台極渴市，單是一斤裝茅台，已由年頭每支一千八百港元，攀升至二千五百元，升幅近四成。

卓妮