又要做騷又怕死，又要攞威又要戴頭盔，一向係港府高官特色，呢，又有真人版示範喇！
邊位高官咁有雅興呢？咪就係外號「林公公」嘅政務司司長林瑞麟，同埋人稱「周一鑊」嘅食衞局局長周一嶽咯。件事係咁嘅，花園街發生奪命大火慘劇後，咪睇呢兩位官場孖寶卸責神速，但做騷效率就一流，慘劇發生第二日，兩人就大鑼大鼓巡視災場。
本來呢，高官做大龍鳳，擾民都算嘞，點知林公公同周一鑊不愧係特衰官僚，連做騷都惹火過人，居然誇張到要戴消防頭盔，仲一身消防指揮官裝束，幾咁英明神武呀，爭在冇戴埋口罩咋，如果唔係，大家仲以為沙士重臨，董太又以「幪面超人裝」出嚟打救港人！
花園街排檔嘅計時炸彈存在已久，咁耐以嚟冇官員入嚟望過一眼，依家火災慘劇奪去九條人命，林公公同周一鑊先至嚟做騷，有咩用呢？政治騷唔係神功戲，死者唔會欣賞㗎！
正如有人話齋，林公公同周一鑊全副武裝巡花園街，同董太當年全副防生化裝備探訪牛頭角下邨一樣，只會向受害者傷口撒鹽，向沸騰民怨火上澆油。不過，計功夫茶話齋，兩件事有一個不同地方，就係董太嘅防生化裝備的確可以防病毒，但林公公同周一鑊嘅消防裝束，除咗做騷，仲有乜用途呢？大火已經燒完，一切無可挽回，戴頭盔唔通係驚被災民掟蕉？
嗱，港府無樣叻，最叻做騷整色整水，餐餐天災人禍過後，先至急急補鑊虛應民意，識得七情上面做大龍鳳嘅官場老戲骨，絕對唔止林公公同周一鑊。食環署話喎，已經加強巡查全港排檔，共發現逾千個違規事項，涉及六百幾個排檔，淨係尋日就提出四百四十宗違規檢控。唉，賊過興兵，次次搞出人命先至做嘢，唔怪得死得人多啦！
事實證明，排檔危機長期存在，只係港府一直闊佬懶理，關人個關。其實，《東方日報》同《太陽報》早就踢爆花園街排檔問題危機四伏，仲以專題報道詳盡揭露，如果港府重視市民安全，及時採取防範措施，今次慘劇完全可以避免。「我不殺伯仁，伯仁因我而死」，話港府草菅人命，絕對冇講錯。
不可一，不可再，血的教訓一次也嫌多。港府高官唔好又諗住做完騷就過骨吖！有問題嘅排檔唔止花園街，港九新界各區遍布計時炸彈，如果繼續吊吊揈，萬一再出事嘅話，你哋就算着消防衣，戴頭盔都保唔住！