政情：立會記者同樂日「安歌」
立法會搬入添馬艦新大樓初期，對新聞採訪施加諸多限制，班新請嘅保安又對記者好唔客氣，令立法會同傳媒之間嘅關係跌至冰點。不過，隨着立法會迅速撥亂反正，作出改善，雙方關係已和好如初，嚟緊仲會復辦「立法會議員記者同樂日」添，等大家可以放下攝影機同錄音機，輕輕鬆鬆開心玩番晚！
立法會內務委員會尋日正式通過，喺今屆立法會四年任期完結前舉辦議員記者同樂日，暫定喺明年三月底進行，由內會主席劉健儀擔任同樂日籌委會主席，稍後會邀請其他議員同傳媒代表加入，齊齊諗吓當日有乜遊戲玩。
對上一次同樂日已經係○八年嘅事，當年破天荒引入議員同記者即場鬥打機，仲有一齊煮嘢食，仲有次次同樂日都有嘅議員記者扮嘢環節。不過，今年籌委會先要諗諗嘅，就係需否改期進行，因為三月底正係下屆特首選舉大日子，傳媒肯定忙於採訪特首選戰或剛選出嘅候任特首，未必可以抽空出席同樂日，到時得番小貓三四隻就唔好睇啦！