政情：工聯九西搶位 鼠王芬腳軟
區議會選舉結束唔夠一個月，部分政黨已密鑼緊鼓研究明年立法會選舉部署安排，好似今屆區選首次唔再幫建制派陣營抬轎嘅工聯會，由於區選成績理想，計劃再下一城揮軍直闖明年立法會選舉。我哋收到最新消息，工聯會已經決定明年會首度派人出戰九龍西選區，最直接受影響嘅肯定就係○八年選舉中僅僅夠票入立法會嘅「鼠王芬」梁美芬。
據了解，工聯會區選後開咗足足三日檢討會，會上各人認為，如果要實踐由參選超級區議會嘅「票后」陳婉嫻做軸心，帶領其餘五個地區直選參選人打仗嘅「風車戰陣」，工聯會喺九龍西就絕對唔可以缺席，消息人士話：「喺選舉戰略上，要呼籲支持者投票梗係話『兩票投晒工聯會』，咁先易記嘛！」
屬意基層代表出選
消息仲話，一個風車最緊要係轉得順暢，最緊要係靠軸心，如果有一邊卡住、卡住，好容易會搞到燒摩打。嫻姐作為成個選舉部署嘅軸心，得票一定要高，咁工聯會將來先至可以繼續以自己名義出選，如果獨缺九龍西嘅協同效應，搞到嫻姐失去部分選票嘅話，對工聯會來講認真唔係好事。
有部署，當然同時要有人選。據悉，工聯會有見九龍西基層眾多，今次屬意來自基層嘅代表出戰，暫時內部有兩個可能人選，分別係曾經做過勞工界立法會議員嘅工聯會副會長梁富華，以及來自建造業總工會嘅工聯會副理事長周聯僑，兩位喺勞工界都甚有名望，如果真係成事，相信有一定號召力。
九龍西選區明年議席唔會增加，如果工聯會真係加入競逐，○八年五位候選人中得票排最尾嘅鼠王芬就好大件事，事關佢當年得到工聯會同左派團體大力襄助拉票，最終都只得不足兩萬票，如果明年失去工聯會支持，議席可以話係危危乎。不過，工聯會係咪可以成功派人落場，都要睇吓夠唔夠牙力謝絕更高層次嘅干預，否則最終又係「跪低」幫人抬轎收場。