生兒育女的確係一件非常頭痛嘅事，搞到香港人極之唔願意為人父母，所以本地出生率持續偏低。之不過咁，始終有勇者無懼嘅港男港女熱衷於傳宗接代，肩負起宗族繁衍嘅神聖任務。問題係，源源不絕嘅內地孕婦將「共產主義」帶到香港，醫院逼爆玻璃之下，本地孕婦幾乎淪為產科難民。所謂共產咯喎，即係「共你齊齊生產」囉！
好嘞，假設你十五十六正在考慮是否生兒育女，會唔會覺得有薪侍產假係一項誘因呢？侍產假即係男士放假照顧太太，分擔一下生仔嘅萬般苦惱。你知啦，十月懷胎係幾咁浩大嘅工程，臨盆前夕更加係手忙腳亂一頭煙，太太如果冇丈夫從旁照顧，有時真係會覺得生舊叉燒好過生仔。
呢嗱嗱嗱，講過香港人最好生三個嘅曾蔭權，終於喺佢最後一份施政報告拋出侍產假概念，算得上係有少少催生作用。當然啦，功夫茶建議煲呔曾大搞「獎勵生育」，只要生兒育女學似六千蚊計劃咁樣有錢派，本地出生率先至有望大幅提高。
之但係，侍產假概念無疑值得推敲，可惜公務員出身嘅曾蔭權始終擺脫唔到明益自己友嘅習性。佢話喎，政府研究推出男士侍產假，有關建議將由公務員帶頭實施。
喂喂喂，點解要由公務員帶頭實施？點解唔將計劃擴展至每一階層？尋日喎，立法會討論侍產假，公務員事務局局長俞宗怡表示，政府將於未來一兩個月內提出諮詢文件，徵詢不同公務員團體意見，目標係明年下半年實施。有議員講得啱呀，呢種做法令全港其他僱員同公務員嘅福利愈拉愈遠，根本係陷公務員於不義，建議立法容許全港僱員同樣享有侍產假。議員認為僱員使用侍產假機會不多，應該更加容易全港推行。
計功夫茶話齋，公務員實施有薪侍產假唔會有任何阻力，而且有理由相信極速辦妥，事關享盡福利呢家嘢，特區官僚最耍家。記唔記得公務員實施五天工作周？一話星期六唔使返工啫，特區政府上下一心實施得妥妥當當，星期五收工馬上迎接周末狂熱。其他打工仔就可憐咯，從未見過政府為佢哋爭取一星期返五日工。
至於公務員爭取加薪嘅狼胎狠勁，睇怕唔使功夫茶多講嘞，經濟好時固然要加薪，經濟差時仍然要加薪，最低限度唔做得減薪，一減就殺你全家咁嘅款。
唉，曾蔭權親疏有別都出晒名o架嘞，侍產假再次明益自己友其實都唔算意外。總而言之，只准州官放假，不許百姓侍產，怨只怨你當初唔識得投身官場！